लोटे औद्योगीक वसाहतीतील डिवाईन केमिकल्स या कारखान्यात झालेल्या दुर्घटनेला जबाबदार धरत प्रदूषण नियंत्रण मंडळाने कंपनी व्यवस्थापनाला सेफ्टी क्लोजरची नोटीस बजावली आहे. दुर्घटना घडलेल्या प्रभावित क्षेत्रात काम सुरु न करण्याचे आदेश या नोटीसद्वारे दिले आहेत असे वृत्त सामना वृत्तसंस्थेने दिले आहे.
महाराष्ट्र प्रदूषण मंडळाच्या कोल्हापूर कार्यालयाने ही नोटीस बजावली आहे. 13 नोव्हेंबर रोजी या कारखान्यात स्फोट होऊन सात कामगार गंभीर जखमी झाले होते. या पैकी सहा कामगारांचा उपचारांदरम्यान मृत्यू झाला होता.
या दुर्घटनेनंतर महाराष्ट्र प्रदूषण नियंत्रण मंडळाच्या अधिकाऱ्यांनी कारखान्यात जाऊन दुर्घटनेची पूर्ण तपासणी केली होती, या चौकशी अहवालात कारखाना व्यवस्थापनावर ताशेरे ओढण्यात आले होते. या अहवालात कारखाना व्यवस्थापनाचा बेजबाबदारपणा आढळून आल्याने महाराष्ट्र प्रदूषण नियंत्रण मंडळाने कारखाना व्यवस्थापनाला नोटीस बजावून ज्या ठिकाणी आग लागली त्या जागेत काम न करण्याचे आदेश दिले आहेत.
लोटे औद्योगिक वसाहतीतील रासायनिक कारखान्यांमध्ये कामगारांच्या सुरक्षेबाबत नेहमीचीच बोंबाबोंब राहिली आहे. त्यामुळे गेल्या काही वर्षात या औद्योगीक वसाहतीत अनेक जीवघेणे अपघात होऊन कामगारांचा बळी गेला आहे. अशीच एक घटना 13 नोव्हेंबर 2022 रोजी दुपारी 12 वाजण्याच्या सुमारास घडली होती. कंपनीमध्ये फेब्रिकेशनचे काम सुरु असताना वेल्डिंगची ठिणगी उडाली आणि कंपनीत स्टॉक करून ठेवण्यात आलेल्या ज्वालाग्राही रसायनाने पेट घेतला. या दुर्घटनेत कारखान्यात काम करणारे सात कामगार गंभीर रित्या होरपळून निघाले. कंपनी व्यवस्थानाने जखमी कामगारांना तात्काळ चिपळूण येथील खासगी रुग्णालयात उपचारांसाठी दाखल केले मात्र त्यांची प्रकृती चिंताजनक असल्याने चिपळूण येथे प्रार्थमिक उपचार करून त्यांना अधिक उपचारांसाठी ऐरोली येथील नॅशनल बर्न रुग्णालयात हलविण्यात आले होते.
या रुग्णालयात उपचार सुरु असताना एका मागोमाग एक अशा सहा कामगारांचा मृत्यू झाला होता तर एक कामगार आजही रुग्णालयात उपचार घेत आहेत. या दुर्घटनेनंतर शासकीय यंत्रणांनी तपासकामाला सुरवात केली होती. या दरम्यान प्रदूषण नियंत्रण मंडळाने केलेल्या तपासात प्रथमदर्शनी कंपनी व्यवस्थापन दोषी आढळून आल्याने प्रदूषण नियंत्रण मंडळाने कंपनी व्यवस्थापनाला कंपनीतील उत्पादन बंद करण्याचे आदेश दिले. दरम्यान कंपनी व्यवस्थापनेचे आपली बाजू मांडली असून या दुर्घटनेला वेल्डिंगचे काम करणाऱ्या ठेकेदाराला जबाबदार धरले आहे.
डिवाईन कंपनीतील दुर्घटनेस ठेकेदार जबाबदार; कंपनीचा दावा
डिवाईन केमिकल कंपनीत झालेल्या दुर्घटनेस ठेकेदाराचा बेजबाबदारपणा असल्याचा आरोप कंपनी व्यवस्थापनाकडून करण्यात आला आहे. ठेकेदाराच्या निष्काळजीपणामुळेच कामगार होरपळून जखमी झाले, असा दावा कंपनीने केला आहे. फेब्रिकेशन ठेकेदार दीपक महाडिक यांनी वेल्डिंगचे काम करताना काळजी घेतली असती, तर हा अपघात टळला असता.असे या अपघातात जखमी झालेल्या एका कामगारांने म्हटले आहे.
कंपनी व्यवस्थापनाने आपली बाजू मांडताना म्हटले आहे की, या कामगारांच्या उपचाराचा संपूर्ण खर्च कंपनीने व्यवस्थापनाने उचलला. ज्या ठेकेदाराच्या कर्मचाऱ्याचा मृत्यू झाला, त्या ठेकेदाराने मरण यातना भोगणाऱ्या कर्मचाऱ्यांची काळजीही घेतली नसल्याचेही कंपनीने म्हटले आहे. मात्र, संबधित विभाग व अन्य संस्था डिवाईन कंपनीलाच दोष देत असून या दुर्घटनेला ठेकेदार जबाबदार नाही का, असा सवाल कंपनीने उपस्थित केला आहे. कंपनीने पुढे म्हटले आहे की, फॅब्रिकेशन आणि वेल्डिंगची वर्कऑर्डरही कंपनी व्यवस्थापनाने दीपक महाडिक यांच्या कंपनीच्या नावावर केली होती. मात्र, महाडिक यांनी जुने नाते सांगून वर्कऑर्डर घेण्यास नकार दिला होता. मात्र, कंपनीत महाडिक यांनी स्वतःची वेल्डिंग मशिनरी आणि चार कामगारांसह स्वतंत्र तपासणी, देखरेख आणि नियंत्रणाखाली 12 नोव्हेंबरपासून पार्टीशनचे काम सुरू केले होते.
कंपनी व्यवस्थापनाचा आरोप आहे की, ज्या ठिकाणी हि घटना घडली त्या ठिकाणी एका छोट्या स्टोअर हाऊसमध्ये काही केमिकलचे ड्रम सुरक्षितपणे ठेवण्यात आले होते. फॅब्रिकेशनचे काम करणाऱ्या ठेकेदार आणि त्याच्या कामगारांनी वेल्डिंगचे काम अतिशय सुरक्षितपणे करायला हवे होते. त्यांनी खबरदारी घेतली असती तर हा अपघात झाला नसता, असे कंपनी व्यवस्थापनाचे म्हणणे आहे, अशा कंत्राटदाराला सर्व कंपन्यांनी काळ्या यादीत टाकावे, असे देखील डिवाईन कंपनीच्या व्यवस्थापनाने म्हटले आहे.
