गडचिरोली : लॉयड्स मेटल्स ॲन्ड एनर्जी लिमिटेडने सोमवारी हेडरी झोन येथे आपल्या 1692 कर्मचाऱ्यांना कर्मचारी स्टॉक ओनरशिप प्लॅन लागू करत त्यांना कंपनीचे शेअर वाटप केले. कंपनीचे व्यवस्थापकीय संचालक बी.प्रभाकरन यावेळी आपल्या भावना व्यक्त करताना म्हणाले, 'या शेअर्सच्या माध्यमातून कर्मचारी आता कंपनीचे भागीदार झाले आहेत. भविष्यात कंपनीचा एक कर्मचारी कंपनीचा संचालक होईल', असा विश्वास त्यांनी व्यक्त केला असे वृत्त बेरार टाईम्स वृत्तसंस्थेने दिले आहे.
कॉर्पोरेट क्षेत्रात एक आदर्श प्रस्थापित करत, लॉयड्स मेटल्सने आपल्या कर्मचाऱ्यांसाठी सातत्याने कर्मचारी स्टॉक ओनरशिप प्लॅन (ESOP) लागू केला आहे. आतापर्यंत 10 हजार 630 कर्मचाऱ्यांना शेअर्सचे वाटप करण्यात आले. सोमवारी हेडरी झोन येथे शेअर्स वितरण समारंभाचे आयोजन करण्यात आले होते. या उपक्रमामुळे कर्मचाऱ्यांना केवळ आर्थिक सुरक्षितता मिळत नाही, तर कंपनीच्या प्रगतीमध्ये दिलेल्या योगदानासाठी त्यांना योग्य सन्मान आणि पुरस्कारही मिळतो.
कार्यक्रमाची सुरुवात दीपप्रज्वलनाने झाली. त्यानंतर छत्रपती शिवाजी महाराज आणि भगवान बिरसा मुंडा यांना आदरांजली वाहण्यात आली. उपस्थितांना संबोधित करताना, बी.प्रभाकरन यांनी कर्मचाऱ्यांचे अभिनंदन केले आणि सांगितले की, ते आता फक्त कामगार नसून, कंपनीचे भागीदार झाले आहेत. कर्मचाऱ्यांच्या समर्पणाबद्दल कृतज्ञता व्यक्त करत, त्यांनी LMEL च्या जलद वाढीबद्दल आणि जिल्ह्याच्या सर्वांगीण विकासावर, सकारात्मक प्रभावाविषयी सांगितले. त्यांनी मेहनत करणाऱ्या आणि उत्साही तरुणांना जागतिक स्तरावर सर्वात कुशल व्यावसायिक म्हणून उदयास आणण्याची आपली दृष्टी मांडली.
प्रभाकरन यांनी आठवण करून दिली की, या भागाला मुख्य प्रवाहात आणण्याची दूरदृष्टी मुख्यमंत्री देवेंद्र फडणवीस यांची होती. लॉयड्स मेटल्स ते स्वप्न सक्रियपणे साकार करत आहे. त्यांनी कर्मचाऱ्यांनी या प्रदेशाच्या विकासासाठी सर्वोत्तम प्रयत्न करावेत, असे आवाहन केले. आपली दीर्घकालीन बांधिलकी अधोरेखित करताना, प्रभाकरन यांनी गडचिरोलीला "नवीन जमशेदपूर" मध्ये रूपांतरित करण्याची आपली महत्त्वाकांक्षा पुन्हा व्यक्त केली.
यावेळी त्यांनी या दूरस्थ भागात काम करणाऱ्या डॉक्टर आणि अभियंत्यांचे विशेष आभार मानले. सुरक्षित आणि समावेशक कार्य वातावरण तयार करण्यात सुरक्षा कर्मचाऱ्यांच्या महत्त्वपूर्ण भूमिकेचाही त्यांनी गौरवपूर्ण उल्लेख केला.
उत्कृष्ट कार्यसंस्कृतीची निर्मिती करणे आणि अर्थपूर्ण यश मिळवणे हे लॉयड्स मेटल्स अँड एनर्जी लिमिटेड (LMEL)चे खास वैशिष्ट्य राहिले आहे. व्यवस्थापकीय संचालक बी.प्रभाकरन यांच्या नेतृत्वाखाली या कंपनीने एकेकाळी नक्षलवादासाठी ओळखल्या जाणाऱ्या गडचिरोली जिल्ह्याला एका विकसित औद्योगिक केंद्रात रूपांतरित करण्यात महत्त्वपूर्ण भूमिका बजावली आहे.
