मुंबई : महाराष्ट्र राज्य किमान वेतन सल्लागार मंडळाची दुसरी बैठक कामगार भवन, बांद्रा-कुर्ला संकुल, मुंबई येथे मंडळाचे अध्यक्ष गणेशभाऊ ताठे यांच्या अध्यक्षतेखाली संपन्न झाली.
बैठकीच्या सुरुवातीस मागील बैठकीच्या इतिवृत्तास मान्यता देण्यात आली. त्यानंतर खालील सहा उद्योगांमध्ये कार्यरत कामगारांना देण्यात येणाऱ्या किमान वेतनासंदर्भात सविस्तर चर्चा झाली:
१) सौंदर्यप्रसाधने व साबण निर्मिती उद्योग
२) मद्य उत्पादन उद्योग
३) यंत्रमाग उद्योग
४) अनुसूचित नोंद ६ किंवा २३ अंतर्गत येणारे रुग्णालये वगळता इतर सर्व दवाखान्यांतील रोजगार
५) सिमेंट-आधारित उद्योग (गट–ब)
६) कापड रंगाई व छपाई उद्योग
बैठकीत चर्चा करताना ग्राहक किंमत निर्देशांक, पायाभूत निर्देशांक, राहणीमान भत्ता यांचा अभ्यास करून या सर्व सहा उद्योगांसाठी नवीन किमान वेतन दर निश्चित करण्यात आले.
मंडळाने किमान वेतन निश्चित करताना उद्योजक आणि कामगार दोघांचाही समतोल राखण्याचा प्रयत्न करत सकारात्मक दृष्टीकोन ठेवला असल्याचे अधोरेखित करण्यात आले.
अतिरिक्त कौशल्य श्रेणीचा प्रस्ताव
अध्यक्षांच्या संमतीने घेतलेल्या ऐनवेळेच्या निर्णयानुसार, राज्यातील किमान वेतन ठरवताना आतापर्यंत केवळ कुशल, अकुशल आणि अर्धकुशल कामगार वर्ग विचारात घेतला जात होता. मात्र, मंडळाचे अध्यक्ष यांनी नवीन सूचना मांडत ‘अतिरिक्त कुशल (Highly Skilled)’ या नवीन श्रेणीतील कामगारांचे किमान वेतनही निश्चित करण्याचा प्रस्ताव ठेवला. हा निर्णय झाल्यास सुमारे तीन कोटींपेक्षा अधिक कामगारांना त्याचा लाभ होईल, असे बैठकीत नमूद करण्यात आले. यासंदर्भात सविस्तर प्रस्ताव तयार करून राज्य सरकारकडे मंजुरीसाठी पाठविण्याचे ठरविण्यात आले.
बैठकीस मंडळाचे सचिव व सहाय्यक कामगार आयुक्त अक्षय तुरेराव, मालक प्रतिनिधी म्हणून श्रीकांत देशमुख, चंद्रकांत महाडिक, संतोषराव देशमुख, कामगार प्रतिनिधी म्हणून योगेश आवळे, संजयराव जोरले, माणिकराव पाटील, स्वतंत्र प्रतिनिधी म्हणून विरेंद्र ठाकूर, सुबोध देवूळगावकर, बिपिन गांधी, अध्यक्षांचे सल्लागार डॉ. अमित भोसले, जनसंपर्क अधिकारी अमितदादा कदम, तसेच कामगार विभागाचे उदय रासम, सुरज पाटील, दिप्ती कावळे, सायली शेलार आदी मान्यवर उपस्थित होते.
