रायगड : एमआयडीसीमध्ये भीषण आग लागली आहे. एमआयडीसीतील एका कंपनीला ही आग लागली आहे. कंपनीत केमिकल ड्रम असल्याने आगीचा मोठा भडका उडाला आहे. या आगीत दोन कामगार जखमी झाले असल्याची प्राथमिक माहिती मिळाली आहे.आगीची माहिती मिळताच अग्निशमन दलाचे जवान घटनास्थळी दाखल झाले असून आगीवर नियंत्रण मिळवण्यासाठी शर्थीचे प्रयत्न सुरू आहेत असे वृत्त Times Now मराठी
मिळालेल्या प्राथमिक माहितीनुसार, रसायनी पाताळगंगा एमआयडीसीमधील एका कंपनीत ही आग लागली आहे. आग नेमकी कशामुळे लागली याची माहिती समोर येऊ शकलेली नाहीये. मात्र, घटनास्थळावर केमिकलचे ड्रम असल्याने आग मोठ्या प्रमाणात पसरत आहे तसेच केमिकलमुळे आगीचा भडका उडताना सुद्धा दिसून येत आहे. दोन कामगार जखमी झाले असल्याचं वृत्त समोर आलं असून त्यांना उपचारासाठी रुग्णालयात दाखल करण्यात आले आहे.
प्राथमिक माहितीनुसार, एमआयडीसीमधील इस्कॉन सोनी कंपनीच्या गोदामाला भीषण आग लागल्याचं बोललं जात आहे. या कंपनीच्या गोदामात केमिकलचा साठा असल्याने आगीने रौद्र रूप धारण केलं. तसेच आगीचा मोठा भडका सुद्धा उडताना दिसून येत आहे. घटनास्थळी अग्निशमन दलाचे जवान, पोलीस दाखल झाले आहेत. अग्निशमन दलाच्या जवानांकडून आगीवर नियंत्रण नियंत्रण मिळवण्याचे प्रयत्न सुरू आहेत.
तसेच या कंपनीच्या गोदामात कोणी कामगार अडकलेले आहे की नाही याचाही शोध घेण्यात येत आहे. आग इतकी भीषण आहे की, आगीच्या ज्वाळा दूरवरुनच दिसत आहेत. तसेच धुराचे लोटही त्या परिसरात दिसून येत आहेत.
एमआयडीसीतील कंपनीत आग लागल्याच्या घटना या सुरूच असल्याचं पहायला मिळत आहे. त्यामुळे कंपनीतील कामगारांच्या सुरक्षेचा प्रश्न सुद्धा कायम असल्याचं दिसून येत आहे. आतापर्यंत एमआयडीसीत स्फोट किंवा आग लागल्याच्या अनेक घटना घडल्या आहेत आणि या घटनेत अनेक कामगारांना आपले प्राण सुद्धा गमवावे लागले आहेत. पण असे असतानाही आगीच्या घटना काही कमी होताना दिसून येत नाहीयेत तसेच सुरक्षेच्या संदर्भात काही ठोस उपाययोजना केल्याचं दिसून येत नाहीये.
