वसई तालुक्यातील चंद्रपाडा ग्रामपंचायतीच्या हद्दीतील कॉसपाॅवर प्रा. लि. या इलेक्ट्रिकल पार्ट्स आणि पॅनल बोर्ड बनविणाऱ्या कारखान्यात बुधवारी (दि.२८ सप्टेंबर) दुपारी हायड्रोजन सिलिंडरचा स्फोट झाला. त्यात तीन कामगारांचा होरपळून जागीच मृत्यू झाला आहे, तर आठ कामगार जखमी झाले. त्यांना उपचारासाठी रुग्णालयात हलविण्यात आले आहे असे वृत्त लोकमत वृत्तसंस्थेने दिले आहे.
संध्याकाळी आग विझवण्यात यश आले असून तीव्र स्फोट झाल्यानंतर लागलेल्या आगीने भीषण रूप धारण केले होते. स्फोटामुळे जवळपासचे कच्चे बांधकाम आणि कारखान्याचेही नुकसान झाले आहे. वसईच्या चंद्रपाडा भागात कॉस पावर प्रा. लि. कंपनी आहे. त्यात इलेक्ट्रिक पार्ट्स आणि पॅनल बनविले जातात. बुधवारी (दि.२८ सप्टेंबर) दुपारी तीन वाजेच्या सुमारास कंपनीत अचानक हायड्रोजन सिलिंडरचा स्फोट झाल्याचे सांगण्यात आले. मोठा आवाज होत बॉयलर फुटल्याने आग लागली. काही वेळातच आगीने भीषण रूप धारण केले.
आगीच्या उंच ज्वाळा पाहून आजूबाजूचे लोक घाबरले. अपघातावेळी कंपनीत कामगार काम करत होते. या अपघातात तीन कामगार होरपळले, तर आठ कामगार भाजले. अपघाताची माहिती मिळताच परिमंडळ-२ चे पोलीस उपायुक्त संजयकुमार पाटील, सहाय्यक पोलीस आयुक्त पंकज शिरसाट, वालीवचे वरिष्ठ पोलीस निरीक्षक कैलास बर्वे आणि इतर पोलीस अधिकारी, कर्मचारी आणि प्रशासनाचे अधिकारी घटनास्थळी दाखल झाले. महापालिकेच्या अग्निशमन दलाने घटनास्थळी पोहोचून तातडीने आग विझविली. रात्री उशीरापर्यंत कंपनीत मदतकार्य सुरू होते. कारखान्यात आणखी काही कामगार अडकल्याची शक्यता व्यक्त करण्यात आली.
