जमशेदपूर : येथील टाटा स्टील प्लांटमध्ये मोठा स्फोट झाला असून त्यामुळे प्लांटमध्ये भीषण आग लागली आहे. या घटनेत तीन मजूर जखमी झाले आहेत.
जमशेदपूरमधील टाटा स्टील फॅक्टरीमध्ये शनिवारी (७ मे) गॅस पाईपलाईनचा स्फोट होऊन भीषण आग लागली. यात आतापर्यंत तीन कामगार जखमी झाले आहेत. जखमी कामगारांना टाटा मुख्य रुग्णालयात दाखल करण्यात आलं आहे.हा स्फोट सकाळी १० वाजून २० मिनिटांनी झाला.
टाटा कंपनीने यानंतर अधिकृत निवेदन जारी केलं. यात त्यांनी म्हटलं, "जमशेदपूर येथे टाटा स्टील फॅक्टरीमधील कोक प्लँटमध्ये स्फोट होऊन आग लागली. सकाळी १० वाजून २० मिनिटांनी ही घटना घडली. सध्या घटना घडली तो कोक प्लँटमधील बॅटरी ६ हा भाग बंद करण्यात येत आहे."
झारखंडचे मुख्यमंत्री हेमंत सोरेन यांनी अपघातात जखमी झालेल्या लोकांची माहिती घेतली. त्यांना उपचारासाठी रुग्णालयात दाखल करण्यात आले आहे. मुख्यमंत्री हेमंत सोरेन यांनी जखमींवर उपचार करण्याच्या सूचना दिल्या आहेत. जमशेदपूर घटनेवर मुख्यमंत्री हेमंत सोरेन यांनी ट्विट केले की, जमशेदपूरमधील टाटा स्टील प्लांटमध्ये स्फोट झाला आहे.
टाटा स्टील प्लांटमध्ये झालेल्या स्फोटामुळे लागलेली आग विझवण्यासाठी अग्निशमन दलाच्या गाड्या घटनास्थळी दाखल झाल्या आहेत. लागलेली भीषण आग विझवण्याचे काम सुरु आहे. अनेक वरिष्ठ अधिकारी घटनास्थळी पोहोचले आहेत.
