मुंबई : वीज उद्योगातील हजारो वीज कामगारांच्या वतीने गुरुवार दिनांक 18 नोव्हेंबर 2021 रोजी राज्य परिवहन महामंडळ कामगारांच्या आंदोलनाला आझाद मैदानात जाऊन प्रत्यक्ष पाठींबा देण्यात आला.
सर्वसामान्य माणसाला एसटीचा प्रवास अत्यंत विश्वासाचा वाटतो, एसटी म्हणजे महाराष्ट्रातील जनतेचे हृदयच कारण जशी रक्तवाहिनी शरीराच्या प्रत्येक भागाला रक्त पुरवठा करते अगदी तसेच राज्यातील काना-कोपऱ्यात प्रवाश्यांच्या सोयी साठी एसटी वाहतुकीची वाहिनी कार्यरत आहे.
या एसटी कामगारांच्या विविध मागण्या मागील अनेक वर्षांपासून प्रलंबित आहे. खाजगीकरण न करता सार्वजनिक वाहतूक व्यवस्था सक्षम करण्यासाठी एसटी कामगारांना शासनात विलीनकरण करून कामगारांना न्याय मिळाला पाहिजे या मागण्या करिता भारतीय मजदूर संघ संलग्न वीज कामगार महासंघ आणि महाराष्ट्र वीज कंत्राटी कामगार संघाने या आंदोलनास जाहीर पाठिंबा दिला.
एसटी कामगार यांच्या मागण्यांवर योग्य तोडगा न निघाल्यास वीज कंत्राटी कामगार देखील या आंदोलनात सक्रिय पाठिंबा देत प्रसंगी रस्त्यावर उतरून आंदोलन करतील असा इशारा महाराष्ट्र वीज कंत्राटी कामगार संघाचे अध्यक्ष नीलेश खरात व सरचिटणीस सचिन मेंगाळे व संघटन मंत्री राहुल बोडके यांनी दिला आहे. वीज कामगार महासंघाचे निवासी सचिव प्रशांत भांबुर्डेकर या वेळी उपस्थित होते.
